محتارين ومخنوقين .. مش عارفين تروحوا شمال واللا تدخلوا يمين .. الحل هنا ببساطة ..

طبعاً فيه شباب كثير بدأوا يتخنقوا ومش عارفين فين الصواب في وسط موجة الاختلافات ..

رأي يتكلم عن النقاب كأصل .. مقابل رأي يتكلم عن النقاب كشيئ لا أصل له ..

رأي يتكلم عن الموسيقي كشيئ حرام .. مقابل رأي يكاد يجعلها عمل مستحب بل وفعل مأثور ..

رأي يتكلم عن اللحية كأصل .. ورأي يتكلم عنها كعادة جاهلية ..

أيوة أيوة أنا سمعاكم دلوقت بتقولوا .. يووووووووووووووووووه .. قرفتوناااااااااااااااااااااااااااا .. نقاب وموسيقي ولحية تااااااااااااااني .. أنتوا معندكوش غيرهم .. بطلوا بقي تمسكوا في القشور وخليكم في اللب ..

طيب .. ماشي .. هنخلينا في اللب والسوداني وجميع التسالي .. بس ياريت تسمعوني المرة دي للآخر ..

مشكلة الناس اللي زهقوا من تكرار الكلام في النقاب واللحية والموسيقي و.... والخ .. أنهم ناس ربنا كرمهم ووصلوا لقناعة معينة في تلك الأمور سواء كانت القناعة دي عن دراسة وفهم .. أو عن تلقين وترديد .. أو عن هوي وموافقة المزاج ..

وكلامي دة .. مش للناس دي.. لكن كلامي هنا للناس اللي لغاية دلوقت مش عارفة توصل لقرار وممكن تكون عايشة في حيرة ومش عارفة تسمع كلام مين ؟.. عشان كدة مش من حق حد مصادرة حق الآخرين في الكلام في هذه الموضوعات علي اعتبار أنها موضوعات عفا عليها الزمن أو أنها موضوعات مكررة .. لأن لو أنت زهقت من تكرار الكلام في الموضوعات دي .. فغيرك لسة بيبحث وعايز يعرف ..

والمشكلة اللي بيواجهها شبابنا صغير السن أنه عايز يعرف الحق والصح لكن لما يحاول يشوف مناقشات في المنتديات يُفاجئ أن الآراء المطروحة دي عبارة عن ’’نسخ" "كوبي بست’’ لكلام كثييييييير وسطور طويييييييييييلة وفيها كتب وأسامي لمشايخ كبيرة ..

طبعاً رد فعل الشباب دول أول ما يشوفوا السطور الطويلة والكلام الكثير والآراء الفقهية المتخصصة المختلفة بتكون ردود فعل مختلفة ..

فيه ناس بتنفخ وتسيب الصفحة خالص ويمكن تسيب الموقع كله .. وهم بيقولوا لنفسهم هيه ناقصة مش كفاية علينا قراية الكتب للمذاكرة .. ناقصين كمان نقرا المجلدات المنسوخة دي .. ؟؟..

وفيه ناس أول ما تشوف الكلام الكثير دة تتنح وتفكر تطنش .. بس بتراجع نفسها وتقول .. نفسي أعرف مين الصح .. ؟؟..

فيعزم أخونا أو أختنا العزم ويقرر الكفاح ودخول معركة قراءة الكلام الكثير دة عشان يوصل لقول فصل وحكم صحيح .. في البداية طبعاً بيحصل له إحولال من كثر السطور .. لكن صاحبنا يعاند ويصمم علي القراءة فيركز القرنية ويسنتر القزحية ويواصل الكفاح والقراءة .. وبعد جهد جهيد يصل لنهاية الموضوع بعد ما يقرا رأي الطرفين ..لكن لما نسأله وصلت لإيه يا أخونا أو يا أختنا .. ؟؟.. فبعد صمت طويييييييل .. يقول مش عارف .. مش قادر أحدد .. !!!

طبعاً .. حقيقي عندك حق .. لأننا ببساطة لا احنا علماء ولا حتي طلبة علم ومش هنعرف نحدد اتجاهنا إلا لو رجعنا للأصول اللي مفيش خلاف عليها .. الأصول اللي بتمثل لي وتمثل لك منطقة أمان مفيهاش شوشرة ولا اختلافات .. ونشوف كيف طبق الأولون ونتمسك بتطبيقهم لأن فيه النجاة..

فمثلاً .. الموضوع القديم الحديث .. النقاب .. بأوجه كلامي لكل أخت منتقبة أو عايزة تنتقب ومحتارة تواجه سيل الأسئلة والتعليقات اللي بتصل لدرجة الاستهجان والاحتقار والانكار ..وبأقول لها .. الرد يا أختي بسيط جداً ..

فالرد من منطلق علماني حقوقي وحرياتي .. هو أن النقاب حرية واختيار .. لو كانت غيري حرة أنها تكشف ما تشاء .. فأنا حرة أن أغطي ما أشاء .. أما إدعاءات الأضرار الأمنية والكلام الخايب عن أن النقاب تُرتكب به الجرائم .. فالرد هو أن كل زي يمكن أن تُرتكب به الجرائم ولم يخرج علينا عبقري يطالب بنزع هذا الزي أو إلغائه .. فكم من جرائم ارتُكبت بلباس عسكري أو طبي ولم نجد من يطالب بمنعها .. وذلك لقناعة تامة لدي العقلاء أن الخلل إنما يكون في مرتكب الجريمة وليس في الزي نفسه .. فلماذا إذاً يُعامل النقاب بهذا القدر من التربص والتصيد ؟؟..

كما أن المفروض أن يتم الكشف عن هوية كل من يدخل أي مكان أكاديمي أو له خصوصية في عضويته .. فمش ممكن يكون الحرس الجامعي مثلاً سايب زيد وعبيد وسوسو توتو يدخلوا سواء كانوا لابسين أو مش لابسين ويجي عند المنقبة ويصمم يشوف هويتها ويصر علي التدقيق معها .. فمن أدراكم أن زيد وعبيد مش داخلين الجامعة ومعاهم مخدرات أو أي محضورات .. ومن أدراكم أن سوسو وتوتو من طلبة الجامعة أو ينتموا للمدينة الجامعية مش ممكن يكونوا فتيات شوارع أردن الدخول للهو داخل الجامعة أو المدينة الجامعية .. وبالتالي الكشف والتأكد من الهوية واجب علي الجميع يا من تريدون الأمن والأمان وحماية أبناءنا وبناتنا من المخاطر ..

أما الرد من منطلق ديني وشرعي .. فللأسف لست أهل علم ولا حتي طالبة علم لكن بعودة بسيطة وصغيرة للأصول .. فهل ممكن نرجع لأصل أعز وأهم من أمهاتنا؟؟ .. لآلآلآلآلآ .. مش أمهاتنا أمهاتنا .. قصدي اللي أغلي علينا من أمهاتنا .. اللي هم أمهات المؤمنين .. فمفيش جدال ولا خلاف في إن أمهات المؤمنين كان حجابهم خارج البيوت هو غطاء الوجه ..

أيوة .. أيوة .. عارفة وشايفة كويس إن فيه نقاقين ’’آه .. النقاق من الفعل نق ينق فهو نقناق وفي لفظ آخر نقانق والمتداول هو نقاق .. دة بس عشان اللي عايز يأصل الكلام ويضبطه لغوياً وميوقعناش في غلط ’’..النقاقين دول هيقولوا .. زوجات النبي دول لهم حكم خاص يعني مثلاً مش ممكن يتزوجوا بعد النبي .. يعني لهم أحكام خاصة بهم لا يجوز أن تسري علي عامة النساء ..

طيب .. طيب .. علي مهلك شوية ..هم زوجات النبي دول مش هم أمهاتنا .. اللي ربنا قال عنهن ’’وأزواجه أمهاتهم’’.. حكم ربنا أن زوجات النبي أم لكل مؤمن .. يعني رغم أنها أم كل مؤمن وأم لكل صحابي .. ومع ذلك أمر رباني أنها تغطي وجهها عن أي صحابي .. ’’اللي هي تُعتبر أمه’’ .. والصحابة دول مين؟؟.. دول أطهر وأنقي الرجال .. طبعاً رجالة اليومين دول ولا حاجة بالنسبة لهم في الطهر والعفاف ..ومع ذلك كانت أم المؤمنين لا تكشف وجهها أمام الصحابي الطاهر العفيف .. فيبقي إيه الحكم علي من هم أقل من هؤلاء النساء وهؤلاء الرجال ؟؟.. إيه الحكم فينا إحنا مسلمين اليومين دول؟؟؟ .. ألا يكون ستر الوجه أمام رجال هذه الأيام أوجب وأولي ..إن كانت من هي خير مني ومنك تستر وجهها أمام من هو خير من أي رجل في هذه الأيام .. ألا يُشجع ذلك الخلف أن يُقلدوا ذاك السلف وأن يسيروا علي درب السابقين الصالحين ؟؟..

ومن ناحية تانية .. أي مؤمنة طبعاً بتحب زوجات النبي صلي الله عليه وسلم أمهات المؤمنين .. ومن علامات المحبة .. الاقتداء بمن تحب .. نقلدهم في كل شيئ في مظهرهم وتصرفاتهم ..

وبعدين حبيبتي لو انتقبتي .. هل ممكن حد يجروء يقول لك نقابك دة بدعة أو شيئ ليس له أصل ؟؟..
لا يقول ببدعية النقاب إلا مختل لا يفقه في دينه شيئ.. والحكم والفيصل أن نأت بكتب السابقين ’’خير من فهم كلام النبي الأمين ’’ ونحتكم لها .. ونردد دائماً ’’ما لم يكن يومئذ دين فلن يكون لنا اليوم بدين’’ ..

إذاً .. فأنت بكشفك لوجهك في أفضل الحالات .. في دائرة المباح وفقاً لبعض الآراء الفقهية .. لكنك بتغطية الوجه أصبحت في دائرة بين مستحب وواجب .. يعني بنقابك هتكوني خرَّجتي نفسك من وَشّ الموشوشين والحيرة بين الآراء باختصار هتكوني في منطقة أمان محدش يقدر يقرقرلك وينخر لك ويحيرك فيها .. باختصار النقاب رقي ورفعة ولا يستطيع أن يقول أحد بضد ذلك ..

ومرة تانية بلاش الصيادين في المية العكرة يقولوا .. يعني اللي تكشف وشها دة مش رقي .. يا ولاد الحلال مش معني إننا نمدح شيئ إننا نعني تلقائيا الذم في ضده إلا إذا جاهرنا وحددنا إن كاشفة الوجه علي خطأ .. ودة مش ممكن يحصل .. فمدحنا للنقاب لا يعنني تطاول علي من تكشف وجهها .. تمام .. زي أختين شكلهم حلو .. لكن فيه واحدة أحلي .. فلما أقول لها أنتي جميلة جدا .. هل دة معناه إن التانية قبيحة ؟؟.. طبعاً لا .. لكن معناه ببساطة أن فيه حلو وفيه أحلي ..بأقول الكلام دة بس .. لإني شفت أخت بتقول ربنا يعيني وألبس النقاب .. فظهرت واحدة من غير مناسبة تقول لها كلام معناه ومالها اللي كاشفة وشها ..!!!.. يا ست الحاجة هي جابت سيرة اللي كاشفة وشها في حاجة؟؟ هي بتدعي بالنقاب مالها ومال اللي كاشفة وشها ..

والخلاصة هنا إننا مش معني إننا بنوجه إخواتنا وبناتنا للنقاب إننا ننتقص من أي واحدة محجبة حجاب شرعي كامل بدون غطاء الوجه .. لأن للأسف فيه ناس مسخرة وقتها وكلامها للتشكيك في النقاب .. وأي موضوع يتكلم عن النقاب ياخدوا الموضوع بشكل عدائي وهوووووووووب يحطوا لنا المنسوخات اللي عندهم .. ونلاقي كلام جامد
للدفاع عن كشف الوجه .. بنقول لهم تاني علي مهلكم يا اخواننا .. مش معني إننا ندعوا للنقاب أننا ننتقص ممن ترتدي الزي السابغ وتكشف وجهها ..

فكفياكم فوبيا النقاب .. وكفياكم أرتكاريا من سيرته ..

المهم .. أخواتي .. لما بأقولك نقاب .. مش بأقول لك دة رأي الشيخ فلان ولا كلام العالم فلان .. لآلآلآلآ.. لأني بصراحة مش من أهل العلم .. لكن مرجعيتي البسيطة هي أصول ديني .. أمهاتي وآبائي وأجدادي من الصحابة والسلف الصالح كان حالهم إيه في الموقف دة ..

ممكن حد يجيب لك رأي صحابي كريم .. جميل .. بس لو قدرت أرجع بالأصل للنبي وفعل النبي يبقي طبعاً الأفضل .. طيب ملقتش لدة أصل .. يبقي نشوف إجماع الصحابة أو أغلبهم كان إيه الرأي اللي اتبعوه .. وأنا هنا رجعتك لأصل قوي وهو تقليد واتباع لأمهات المؤمنين ..

استنوا .. لسة مخلصناش .. أوعوا تروحوا في أي حتة ..

معلش معلش .. اعصر علي نفسك لمونة وتعالي علي نفسك شوية وواصل معانا الله يكرمك ..

لأ .. مش هأتكلم كثير .. بس عايزة أوضح لكم إن علي نفس المثال دة نطبق في كل الأمور اللي لها أصل عند السابقين الأولين .. زي مثلاً اللحية .. طبعاً أحاديث اللحية كثيرة وعديدة والأمر فيها واضح ,,اعفوا اللحي ,, ’’ وفروا اللحي ’’ .. ’’ارخوا اللحي’’ .. أوامر واضحة وصريحة .. ومع ذلك يجيلك الجماعة ’’النقاقين,, بردة وممكن يقولوا لك .. دي كانت بس لمناسبة معينة وظروف معينة .. أو يلعب لك في الكلام الواضح الصريح ويقول لك أصل ماهوووو الحديث كان يقصد .. ...... ويحط كلام كدة كثير كله تفاسير وتخمينات واحتمالات.. واحنا طبعاً اتفقنا نسيبنا من الكلام الكثييييييييير ونرجع للأصل .. اتفقنا نسيبنا من الحادي بادي ونخلينا في المضمون والأمان ..

وبعدين ..أنت بتحب النبي ؟؟ .. آآآه طبعاً .. ’’معلش لو كنت بأرد بالنيابة عنك بس لأني متأكدة م الإجابة’’ .. طيب واللي بيحب حد مش بيقلده ..؟؟.. إذا كان فيه شباب بيحلقوا شعورهم واللا بينكشوا شعورهم عشان يقلدوا ناس بيحبوهم .. طيب معقول الشباب دي تحب ناس عادية ويوصل حبهم لدرجة تقليدهم حتي لو كانت أشكال مجنونة .. وأنت ياللي بتحب النبي مش قادر تقلده في شكله الطيب الراقي ..طيب .. طيب .. هو وصف النبي اتقال فيه ايه في أمر اللحية .. كان النبي صلي الله عليه وسلم ’’كث اللحية’’ .. فكانت اللحية سمته وفعله وأمره .. وكذلك كان حال الصحابة .. فتشبهوا إن التشبه بالرجال فلاح ..

امشي علي نفس الحال في كل الأمور .. زي الموسيقي .. طبعاً مش هنقول هنا إن الخلاف في أمر الموسيقي خلاف معتبر .. مهما جابوا لنا من أسماء كبيرة ومراجع قوية لأن أي اسم مهما كان كبير فليس أكبر من النبي صلي الله عليه وسلم .. ولما نرجع للأصل .. إيه اللي ممكن نقوله؟؟..

بمنتهي البساطة والوضوح .. هنسأل يا تري كان فيه أدوات موسيقي في عهد النبي ؟؟.. أيوة كان فيه .. طيب .. النبي صلي الله عليه وسلم وصحابته اللي السيرة والأحاديث قالت عنهم سكناتهم وحركاتهم كانوا بيحتفلوا بالأعياد والأفراح والانتصارات بالطبل والزمر؟؟.. لأ طبعاً دة موردش عنهم أبداً.. اللهم إلا استثناء الدف .. الدف فقط .. طيب هل ممكن أدوات الموسيقي تكون حلال .. ويتحدد إننا نستخدم منها الدف تحديداً فقط؟؟ .. طبعاً .. لا .. لأن التحديد دليل أنه مستثني من عدة محرمات ..يبقي هنجيب رأي الشيخ الفلاني والكتاب العلاني وعندنا الأصل واضح ليه؟؟..

وعلي هذا المنوال فلتبحث يا كل محتار .. بلاش تدخل مناطق الشبهات بلاش تستند لآراء من هنا وهناك .. لأنك ببساطة عندك الأصل اللي لو تمسكت بيه لن تضل ولن تزل .. خليك بعيد عن الحمي أسلم لنفسك ودينك ..

وأخيراً لكل اخواننا اللي كل ما نتكلم عن مظهرنا الإسلامي نلاقيه أزبد وأرعد وتوعد .. ولم تكن حجته البليدة إلا أن الحديث عن الزي والشكل كلام سطحي وتافه وأن الأمة فيها اللي مكفيها ومش ناقصين خلافات ..!!! ..

بنقول لهم بمنتهي البساطة اللي بيثير المشاكل أنتم مش احنا ..احنا لما بنتكلم عن النقاب بنتكلم من قبيل الدعوة والتذكرة بهدوء وببساطة ومش بنفرضه علي حد ولا بنسفه مخالفينا اللي أخدوا بآراء أخري .. لكن أنتم بتشنجاتكم وعدوانيتكم في الرفض واصراركم علي التسفيه والتحقير بدعوي أن هناك الأهم والمهم .. فأنتم هكذا من يثير المشاكل والمشاحنات .. ووعد منا أنكم لو أخبرتمونا أنكم ستحررون الأقصي فور صمتنا عن دعوتنا .. فإننا سنخرس فوراً عن أي كلام .. لكن .. إن كانت دعوتكم للاهتمام بما هو أهم هو مجرد حيلة لنظل في غيبوبة ودائرة لا تنتهي من الانتظار .. فلا وألف لآلآلآلآلآلآلآلآلآ.. تماما كما وعد بعض الرؤساء في زمن ما بتأجيل الدعوة للتنمية والديمقراطيات حتي ينتهوا من القضاء علي إسرائيل ’’فلا صوت يعلو فوق صوت المعركة’’ ومرت السنوات ولم تُمح إسرائيل ولم تتحق تنمية ولا ديمقراطية ..

وهكذا أنتم يا من تتهجمون علي دعاة الرقي والأخذ بالفضائل .. وتدعون أن الأمة مشغولة بالجهاد .. فلا مننا شوفنا جهاد ولا تحرير أرض ولا حتي ستر عرض .. !!!

فإن كان كل ما تملكون هو الصراخ والعويل والشجب والاستنكار وترون أنكم بتلك الجعجعة مشغولين بالجهاد الحنجوري .. فالله يكرمكم اركنوا علي جنب وسيبونا نبني لبنات صغيرة بسيطة تحتقرونها لكنها بإذن الله ستكون الأساس لبناء عظيم شامخ لأن أساسه صلب ومتين .. وخليكم أنتم في جهادكم الكي بوردي ..

وفي النهاية .. المظهر مش كل حاجة لكنه بداية كل حاجة .. وممكن تبني عليه كل حاجة ..